Geschbräche mim Bruno

Die Mundart-Kolumne von Psst!

Am Mondaa Morje in alla Herrgottsfrieh schdeht de Bruno bei mir vor de Dier. „Hasche´s gsieh, unsa Gschbräch hat doch tatsächlich jemonnde gelääs, hat sich dodriwwa soi Gedonke gemach un serick gschribb!“ „Ja, ich hab´s gsieh. Des is doch schää, wonn des jemonnde regischdriert un driwwa noodenkt, odda?“ „Ja, des schdimmt, awwa mir is ebbes wichdiches dodebei uffgfall. Des hääßt, ich habb dodraus e paar Erkenntnisse gezoo.“ „Deedsche ma veroode, wasfa Erkenntnisse des sinn?“ „Jo, als erschdes isses schää, dass sich jemonnde demit befasst.

Do hat sich der junge Monn e Moinung gebildt, hat awwa e paar wichdiche Informatzjohne dodezu noch net gehatt. Des war also moi Vesäumnis, dass ich die fehlende Infos net glei dezu gehunk hab, war mir in dem Moment vielleicht net wichdich genunk. Un do sieh ich, wie wichdich es is, dass ma alles Notwenniche kommuniziert, as dass dasjähnich, wo sich e Moinung bildt, aa die notwenniche Infos hat. Des werd lääda Goddes in de Bollidik uff alle Ewene oft vesäumt. Un donn neiche viel Bollidigga dezu, sosesaa aus de Hifde se schieße un am Ziel vebeiseschieße.“

„Bruno, do gebb ich da Recht. Awwa wasfa Infos hann do gefählt?“ „Ei ich hab vegess dezusesaa, dass bei uns die Wahlperiode 5 Johr is un dass ma nur ää Wahlperiode gewählt werre konn. Es gebbt aa Kondidaadelischde, wo mehr Elwedritsche druffschdehje, wie gewählt werre känne. Un ma konn aa kumuliere un panaschiere, also quer dorch die Lischde ookreize. Es is aa alles ehreomtlich un noch änns is wichdich: uns Elwedritsche geht’s imma um die Gemoinschaft, net um de äänzelne selbscht. Mittlerweile wääß ich, dass so e Syschdem bei de Mensche so gut wie net funktzjoniere konn, alldieweil bei viele Bollidigga – net bei ne all – Eichennutz un Eichensinn vor Gemoinschaftssinn geht. Bei uns bringt jedi un jeda Äänzelne soi Lääwenserfahrung mit in un es gebbt kää Berufsbollidigga. Des hätt ich dem junge Monn, wo uns gschribb hat, misse vorher saa, donn hätt er wahrschoinz onnaschda geontwort. Ich wääß, es is fa die Mensche net umsetzbar, awwa ma sollt sich trotzdem mol soi Gedonke driwwa mache, wie ma´s bei eich Mensche bessa mache kännt, so mit zommeschaffe iwwa die Grenze vun de Paddeie zum Wohl fa alle Mensche, net bloß fa die eichne Oohänga!“

„Ou, Bruno, jetzat hasche dich awwa eschoffiert!“ „Jo, ´s hat misse sinn. Awwa mir is do die Daa noch ebbes uffgfall, was ma moi Flichel grumblich gemach hat!“ „Jo, geh fort, was waren?“ „Ei do lääs ich, dass de OB vun Bärmesäns soi Schulfreund sosesaa in de Himmel gehobb hat, weil kaum e onnri odda e onnra so viel ehreomtlich fa denne Vorort gemach hätt wie er. Also no moina Moinung is des schun e Homma. Er schdooßt dodemit alle Ehreomtla, wo sich zum Dääl schun viele Johrzehnde ehreomtlich ongaschiere, vor de Kopp.

Zehle die net? Woher hat er soi Infos? Wonn ich beischbielsweis ebbes iwwa Fußball wisse will un froo bloß FCK-Fäns, donn is klar, dass ich heer, bloß die FCKla kännde Fußball schbiele, alle onnre wäre Krutza. Dodemit duut ma alle onnre Unrecht, polarisiert un schbalt die Gsellschaft, was net sinn derf. Ich hab geheert, de OB hätt awwa glei e bissl serick gerudat. Awwa wie des so is, wonn´s Boot Richdung Wassafall treibt, do komma serick rudre wie ma will, des helft nimmi. Also bessa vorher denke! Aa wonn sich de OB bei denne Ehreomtla entschuldicht, do werda long schdromble misse, bissa des widda in die Reih krieht.

Un des mit soim Schulfreund? Wahlkompf, Vedderleswertschaft odda nur Gedonkelosichkeit? – Was zu dem Thema noch basst, is, dasse in de Hexenacht in Winschberch alle Wahlplakade vun de SPD abgeriss honn, dasse zum Dääl Wahlplakade vun de Freie Wähler veschmiert un vekritzeld honn mit beleidichende Texte. Do heert fa mich aa de Schbass uff! Ich saa nur: on de Art un Weis, wie mit polidisch Onnaschddenkende umgong werd, erkennt ma de Charakter vun de Mensche!“

„Moi liewa Bruno, do hasche dich jetzat awwa gonz schää uffgereecht. Jetzat drinke ma mol e Tässel Kaffee, dass de widda bissl runnakummsch, odda?“

„Jo alla, des mache ma – bis zum neechschdemol.“

Rolf Tilly

Rolf Tilly ist Weltmeister-Jahrgang 1954 und von Beruf Diplom-Ingenieur für Elektrotechnik, Schwerpunkt Nachrichtentechnik. Das hat viel mit Kommunikation zu tun, womit er sich sehr intensiv beschäftigt – vor allem in MundArt. Schon als Schüler haben ihn Dialekte interessiert, der Pfälzer Dialekt besonders. Er ist seit 25 Jahren aktiv in der „Fasenacht“, seit 15 Jahren leitet er eine Mundarttheatertruppe, war einige Jahre Kolumnist bei der PZ, hat zwei Mundartbücher geschrieben und ist seit sieben Jahren Autor und Mitstreiter der Kleinkunst-Gruppe „Die 3 Palatinenser“.