Geschbräche mim Bruno

Die psst! Mundart-Kolumne

Die letscht Woch is de Bruno mol widda bei ma uffgetaucht un wollt mit ma e bissl fäälhalle iwwa die Wahle. Er war ziemlich oogefress. Er hat sich gfroot, ob die, wo die AfD gewählt hann, sich mol Gedanke gemach hann, was fa e Aldanadieve des fa Euroba, unsa Land un unsa Schdadt wär.

Er meecht sich des net vorschdelle. Es misst doch jedem, der soi Hernkäschdl inschalt un e bissl noodenkt, klar sinn, dasses fa komblizierde Probläme kää ääfache Leesunge gebbt. Un wie des ausgehje kann, hamma vor Schdigga 80 Johr misse erlääwe. Was de Bruno awwa noch mehr uffreecht, dass di sogenannde etablierde Paddeie schoinz net die notwenniche Schridde se gehje. Warum hann die so viel Schdimme krieht? Kaum jemannde kennt die Kandidadinne un Kandidade un trotzdem werre se gewählt.

Des Dilemma hat, wie aa de Erfolch, einiche Vädda. Des Problem is, dass känna vun denne Vädda bereit is, die Vaddaschaft anseerkenne. De OB freit sich wie e klänne Schneekeenich, dasse so gut abschnitt hann bei de Wahle, dann werre die Probläme gern vedrängt. Wann unsa Schdadtvorschdand net bloß bei guude Ereichnisse un im Wahlkampf in de Presse präsent wäre, sondern aa viele Entscheidunge, wo im schdille Kämmerle getroff werre, mit de Mensche in de Schdadt offe kommuniziere deede, dann hätt die AfD aa kää so guude Kaade gehatt bei de Wahle.

Un des gilt fa alle Paddeie: gehen naus zu de Leit, net bloß zu de Anhänga vun eire Paddei, un redde mit ne. Nur so komma erfahre, wo die Leit in Bärmesäns de Schuh drickt (basst gut, gell?)! De Bruno männt, er hätt oftmols de Indruck, dass de OB un soi Monnschaft gar net wisse, was in de Schdadt un in de Vororde abgeht, alldieweil sie imma nur vun de eichne Paddeifreunde gefilderde Informatzjohn kriehn. Dessentwää tabbt de OB mit soine Mitschdreida aa oft ins Fettnäppche. Es is wichdich, aa imma die onna Seit se betrachde. Dodezu is, des wääß ich aus eichna Erfahrung, de „advocatus diaboli“, also em Deiwel soi Anwalt, gonz wichdich, aa wonna meischdens unbequem is.

Un wie werd´s jetzat weidagehje in Bärmesäns, hat de Bruno gemännt? Ich hab´s em net känne saa, alldieweil ich noch kää Kurs in de VHS gefunn hab, wie ma die Zukunft in de Krischdallkuchel lääst. Es bleibt se hoffe, dass alle Veontwortliche jetzat net ääfach zur Taachesordnung iwwergehje un ernschthaft ihr Hausaufgaawe mache. Vielleicht helft dodebei aa mol e Blick in die Geschichtsbiecha. Un es bleibt se hoffe, dass die Leit im Schdadtvorschdand net uff die Erhaldung vun ihre „Ebheef“ poche un die Veondwordung e bissl brääda vedääle.

De Bruno hat noch gemännt, änns wär schun posidiv beim neije Schdadtrat. Es wäre jetzat zwää Kerchemusigga drin, die wo em gonze Schdadtrat zeiche känne, dass nur mit großa Harmonie e orntlicha Chorklang zammekummt. Un notfalls känne se jo denne Bocksbääniche, wo sich querschdelle, die Fleedeteen beibringe.

Rolf Tilly

Rolf Tilly ist 70 Jahre alt und von Beruf Diplom-Ingenieur für Elektrotechnik, Schwerpunkt Nachrichtentechnik. Das hat viel mit Kommunikation zu tun, womit er sich sehr intensiv beschäftigt – vor allem in MundArt. Schon als Schüler haben ihn Dialekte interessiert, der Pfälzer Dialekt besonders. Er ist seit 25 Jahren aktiv in der „Fasenacht“, seit 15 Jahren leitet er eine Mundarttheatertruppe, war einige Jahre Kolumnist bei der PZ, hat zwei Mundartbücher geschrieben und ist seit sieben Jahren Autor und Mitstreiter der Kleinkunst-Gruppe „Die 3 Palatinenser“.

---

Jetzt Gutscheine fürs Plub gewinnen!

psst! Pirmasenser Storys schenkt dir den Eintritt ins Plub! Wir verlosen drei Pakete á 50 Euro, mit denen du ins Schwimmbad kommst. Damit können du und deine Lieben nach Herzenslust das Pirmasenser Freibad genießen.

Wie du mitmachen kannst erfährst du hier: