Geschbräche mim Bruno

Die Mundart-Kolumne von Psst!

Do vor paar Daa schdeht de Bruno bei mir vor de Dier: „Du, ich muss dich emol ebbes froo!“ „Ei was driggt dich dann so, dass de mich dabba froo musch?“ „Ich wollt emol wisse, warum die Schdadtvorschdänd – mir saan als ´es Triumvirat´ – so wennich Vetraue zu ihre Bürgerinne un Bürger hann?“ „Wie kummsche dann dodruff, Bruno?“ „Ei dodeletscht war doch se lääse, dasse so e Falschparkaschbion an beschdimmde Blätz inbaue wolle, wo dann die Ordnungsomdla sosesaa e Alarm kriehn un die dabba nausfahre känne fa denne Falschparka abschlebbe se losse unnem glei noch e Knellche vebasse känne. Aawa jetzt kummt´s: die wollde de Leit erscht Bescheid saa, wann de Proowebetrieb rum wär. Komma do net mit uffne Kaade schbiele un des de Leit vun vornerin saa? So wär des e vetrauensvolli Zusommeawweit un kää Häämlichduerei!“ Do hab ich em Bruno misse recht gewwe.

Jetzt hat in de Zeidung gschdonn, dasses in Fehrbach e „Schdadtgeschräch“ mit de Bevelkerung gääb, wo des Triumvirat sich anhorche deet, wo die Leit de Schuh driggt. Beim genauere Hiegugge is se erkenne, dass sich es durchwegs schwarze Triumvirat schoinz bloß in die schwarz Hochburch traut. Wichdich is dodebei, dass die Presse vor Ort is un viel Bilder macht, wo uff jedem Bild jeder vun denn mindeschdens zwäämol druff is. Aa, ´s is jo Wahlkomp angesaat. Wie ich dodriwwa so e bissl simmeliert hab, hab ich de Bruno gfroot: „Wie issn des eichentlich bei eich so, honn ihr aa e Parlament odda so?“ „Ei allemol, sogar bessa zommegschdellt wie bei eich. Bei uns gebbt´s vier Paddeie, wo jedi gleich viel Sitze hat. Un jedi Paddei hat genausoviel Männa wie Fraue als Vedrääda. Des bedeit, dass bei uns es Parlament aus vier Grubbe beschdeht, jedi Grubb odda Paddei hat 22 Abgeordnede, 11 Fraue un 11 Männa. Insgesomt also gebbt´s 88 Abgeordnede. Un jeda Beschluss muss mit absoluda Mehrheit getroff werre, als mindeschdens 45 Schdimme. Des hääßt, es misse mindeschdens drei Grubbe zuschdimme un weder die Männer noch die Fraue känne des onnre Geschlecht iwwaschdimme. Ma muss sich also äänich werre, was in de Demokradie net imma ääfach is, awwa es gebbt nix bessres. Un jedem un jeder is klar, dass e Idee odda e Vorschlaach net vun vornerin schlecht is, bloß weil des vunre onnre Paddei kummt.

All wissese, dass aa onnre Midda schlaue Kinna honn. Wär des Sischdeem net aa ebbes fa eich?“ Ich männ, dodriwwa kännde ma mol noodenke, odda?