Geschbräche mim Bruno

Die Mundart-Kolumne von psst! Pirmasenser Storys

Do die Daa kummt de Bruno gonz uffgereecht geflatschat un hat gejapst: „Hasche des mitkrieht? De OB duut jetzat räbbe mit so äm onnre Räbba, de Minischdabrässident vun Bayern macht sich bei `Inas Nacht` zum Schalwes, honn die nix onnres se duu?“

„Tja“, hab ich gemännt, „wonn´s äm Esel so wohl werd, gehda uffs Eis, e OB räbbt un e Minischdabrässident will im Fernseh de große Komika raushänge losse. Brauche die des fa ihr Imitsch? Zu Bärmesäns basst dodezu der schääne Schbruch: Schuschda bleib bei doine Leischde! Vielleicht vesucht de OB jo awwa aa, noodem er mit de Kommunikatzjohn vun uuangenehme Sache jo eher aarich serickhaltend is, saa ich mol, die Sache jetzat se räbbe un männt, donn käm´s bessa riwwa!“

De Bruno hat noodenklich de Kobb geschiddelt un hat gemännt, es deet net longe, womma mit guude Nachrichde imma in de Zeidung brässend is. Ma misst grad die schlechde Nachrichde guud kommunitziere un die Mensche dodebei mitnemme. Ansunschde fiehle sich die Mensche net fa voll genumm un wähle dann die AfD.

Dodezu hat de Bruno noch gemännt, do hett sich jetzat de Daggl Schorsch gemeldt un der hett gemännt, die CDU in Bärmesäns hett bei de Wahle alles richdich gemacht un dessentwää aa so e guudes Ergebnis ingefahr. Tja, do is der Daggl Schorsch genau in die Fall getabbt wie viele onnre aa.

Womma sich die Ergebnisse vun de Kondidaade mol genau betracht, werd ma schun e bissl schdutzich. De Äänzich, wo mehr Schdimme wie die 11 Vordaschde vun de AfD hat, is de OB, der wo jo soi Mandat gaa net oonemmt – außa er gebbt soi Poschde ab un werd hauptberuflich Räbba. Des sollt em schun se denke gewwe, bei alla Frääd iwwa des schoinbar guude Ergebnis.

De Daggl Schorsch sollt vielleicht aa noch e zwäddes Mol driwwa noodenke. Monchmol is e bissl Selbschtkriddik gaa net schlecht. De erschde Schritt hat jo jetzat de OB gemach, wie er zugebb hat, dassa be denne Betreuungskoschde in de Grundschule net so offe mit de Betroffne geredd hat, wie des notwennich gewää wär. Do holt ma halt die Betroffne mit on de Disch un findt gemoinsam e Leesung, die werd donn aa vun ne all mitgetraa. Ach, un beim Zeiche uff onnre mim Finga sollt ma mol soi Hand genau betrachde: Wonn  ich mim Finga uff onnre zeich, zeiche gleichzeidich drei Finga uff mich. Un bevor ich iwwa onnre schäll, gugg ich emol seerscht, ob ich aa moi Hausaufgaawe gemach hab.

Jo, seit die Kinna Ferie hon, hat sich’s e bissl gemach. Schoinz ware die Giftbläddcha doch net soo schlecht ausgefall, odda?

Bevor de Bruno widda „abgedagglt“ is (der hat jetzat misse sinn!), hadda noch gemännt, desjohr deet de Summa uff e Dienschdaa falle. Jo des war der Dienschdaa do die Woch!

Rolf Tilly

Rolf Tilly ist Weltmeister-Jahrgang 1954 und von Beruf Diplom-Ingenieur für Elektrotechnik, Schwerpunkt Nachrichtentechnik. Das hat viel mit Kommunikation zu tun, womit er sich sehr intensiv beschäftigt – vor allem in MundArt. Schon als Schüler haben ihn Dialekte interessiert, der Pfälzer Dialekt besonders. Er ist seit 25 Jahren aktiv in der „Fasenacht“, seit 15 Jahren leitet er eine Mundarttheatertruppe, war einige Jahre Kolumnist bei der PZ, hat zwei Mundartbücher geschrieben und ist seit sieben Jahren Autor und Mitstreiter der Kleinkunst-Gruppe „Die 3 Palatinenser“.