- Newsletter
- Kolumnen
- Kolumne von Rolf Tilly
Geschbräche mim Bruno

Die Mundart-Kolumne von psst! Pirmasenser Storys
Do jetzat oofongs Woch war de Bruno bei ma un hat mich gfroot, was do om Wocheenn los war, bei ihne drunne im Bumbegrund hett de Bodde vibriert un gebrummt, so ufdauffdauffda, die Kinna hedde Ongscht krieht un hedde net schloofe känne.
Do hab ich em Bruno vezehlt, dass in Winzle Dorffescht war un freidags un somschdags oomts de Pank abgong is, also richdich Party mit Leifmussig un aa mit Didschäi bis naachts om ääns. De Bruno hat mich gfroot: „Saa mol, hasch du werklich Mussig gsaat? Do hat´s doch ännsgongs bloß uffdauffdauffda gemach, mortzmäßich laut, do hat ma sich doch känne nimmi unnahalle, odda?“
„Bruno“, hab ich gsaat, „die Junge, wo do kumm sinn, die wolle sich jo net unnahalle, die wolle unnahall werre.“ „Ja, awwa unna Mussig veschdeh ich was onnres“, hat de Bruno gemännt. „Des muss jetzat net grad so klassischi Mussig sinn mit Mozart, Beethoven, Bach un wie die Brieda all hääße. Awwa ich horch als gern zu un sing als aa mit, wonn zum Beischbiel de Reiter Klaus Giddaa schbielt un singt odda de Maxa. Hasch du aa gewisst, dass die Palatinensa extra fa uns Elwedritsche e Lied gschribb honn, wo se als aa singe, wonn se fa Benefiz fa´s Hoschbiz uffdrääde.
Die Elwedritsch singt heit Nacht hääßt des Lied un des singe bei uns schun die Kinna.“ „Du, des hab ich gaa net gewisst, dass ihr aa so gern Mussig mache un singe, des freit mich“. Do hat de Bruno so e bissl gelächelt un hat gemännt: „Ich hab do geheert un gelääs, dass de Winzla Kerchechor widda e Projektchor macht ab oofongs Septemba, do werre Lieda geiebt fa e Woihnachtskonzert glei oofongs Januar. Männsche, dass do vun uns Elwedritsche aa mitsinge dirfde?“ „Ich werr emol denne ihr Vorschdond odda de Dirichent froo, ob des geht. Awwa wonn ihr gern singe un aa orntlich singe känne, geht des beschdimmt. Do wär ich mol geschbonnt, wie des klingt un wer vun de Konzertbesucha eich sieht. Du wääsch jo, eich komma bloß siehje, womma mim Herz gugge konn. Des werd beschdimmt e dolli Sach!“
Mit äm sefriedne Lächle im Gsicht is de Bruno abgedagglt, hat sich nochemo korz rumgedreht un gemännt: „Jo alla, un Dorffescht mit uffdauffdauffda is jo bloß ämol im Johr!“ Un fort wara.
Rolf Tilly
Rolf Tilly ist Weltmeister-Jahrgang 1954 und von Beruf Diplom-Ingenieur für Elektrotechnik, Schwerpunkt Nachrichtentechnik. Das hat viel mit Kommunikation zu tun, womit er sich sehr intensiv beschäftigt – vor allem in MundArt. Schon als Schüler haben ihn Dialekte interessiert, der Pfälzer Dialekt besonders. Er ist seit 25 Jahren aktiv in der „Fasenacht“, seit 15 Jahren leitet er eine Mundarttheatertruppe, war einige Jahre Kolumnist bei der PZ, hat zwei Mundartbücher geschrieben und ist seit sieben Jahren Autor und Mitstreiter der Kleinkunst-Gruppe „Die 3 Palatinenser“.