Geschbräche mim Bruno

Die Mundart-Kolumne von psst! Pirmasenser Storys

Do die Woch war de Bruno vebeikumm. „Dodeletscht hasche doch gsaat, dass de in Urlaub fahrsch. Wo machschn eichentlich onne?“ „Ei mir fahrn e paar Daa noo Leipzich“, hab ich gsaat, „warsche do schunnemol?“ „Nää, awwa geheert un gelääs hab ich schun vun dere Schdadt. Do war doch de Johann Sebastian Bach aktiv. Dem soi Mussig is doch Mussig fa die Ewichkeit, ich horch se ma als gern oo.“

„Hhm“, hab ich iwwaleet, „saa mol Bruno, hettsche Luscht fa mitsefahre? Mir werre uns do einiche Sache oogugge, des wär beschdimmt aa fa dich intressant, was mennsche?“ Do hat mich de Bruno mit große Aue oogeguggt: „Mennsche des ernscht?“ „Ei allemol, fa dich is aa noch Blatz im Wohnmobil.“ „Donn fahr ich mit!“ Do kummt de Bruno mol aus de Palz raus in die neije Bundeslända. Alladings, des hab ichem donn noch erklärt, redde die Leit dort net so Pälzisch wie mir. Die honn aa teilweise onnre Werda, die wo mir net so kenne. Die saan zume Beleechde „Bemme“ odda „Fettbemme“ un zume gegrillde Hähnche saan die „Broiler“. Un denne ihr Schbrach heert sich onnaschda oo wie unsri. Alla, mir werre mol gugge, wie´s klabbt un mir werre hinnenoh berichde, wie´s war.

De Bruno hat awwa nochwas uffem Herz gehatt. Es is um die Untat vun Solinge gong, un dass die Bollidigga jetzat mache wie gedoppt. Gäjeseidich duun se sich iwwadreffe mit Fordrunge, dass ma die Zahl vun de Asylsuchende begrenze muss, dass ma die, wo abgeschoob werre missde, schnella un konsequenda abschiewe misst un dass des sowieso alles die Schuld vun de Ampel wär unsoweida.

Er hat gemännt, er hätt schun lang nimmi soviel Leit so viel lieje geheert. Unsa Grundgesetz losst die Inschränkung vum Asylrecht schummo gar net zu. Un womma Syrer un Afghane abschiewe will, muss ma des vorher mit denne Schdaade veeinbare. Dodezu isses schummo notwennich, dass ma diplomadische Beziehung zu denne Schdaade hat. Homma die? Nää, die homma net, un dodemit hat sich des gonze Geschbräch schun erledicht. Un do misse die Bollidigga aa so ehrlich sinn un des de Mensche vegliggere, sunscht werd die Bollidigg(a)vedrossenheit als ännsgongs greeßa.

Un de große CDU-Vorhuppsa Merz (ää Merz macht noch kää Friehling) sollt ab un zu moo droo denke, dass des „C“ in CDU fa „chrischtlich“ schdeht. Wie komma des so schää in de Biwel lääse, wo de Jesus sellemols gsaat hat: „Kommt alle zu mir, die ihr mühselig und beladen seid, ich will euch erquicken!“ Mehr muss ma dodezu net saa, odda?