Fagess ä mool Eier Redd näd! “Isch grie die Gääsegichder”

Alla Hopp! Ihr honn ma ja jo schähne Forschläsch gemach fa ä Nome fa die Kolumne. Die hamma all guud gfall. „Vunn de Lung uff die Zung“ geherd doo zu de Favoridde. „Zwische Weck, Woi unn Wohnsinn“ war änner vunn meerere Vorschläch vunn de Melonnie, dess iss die, vunn „Wass iss los inn Bärmesens“ Donkschä nochämol oan all, die ma gschribb honn. Unn: fagess ä mool eier Redd näd.

Oam leschde Samschdaa hadd jo unnser Klubb ä grossa Ufftritt ghatt im Bokal. De HSV waar in de Schdadd, ä eschder Bundesliggischd. „Ihr Leid was Leid“ hadd mal ä alder FKPler, es Joschde Emilsche, gonz frier mool gsaahd, als die Masse vunn FKP-Fäns noch ins Schdadion oan de Zwäbrigger Schtross gschdreemnd sinn. Jetzad waa ess Fromas-Schdadion zum zwädde Mool ausfakaaf. Zeedausend Leid.

Unn was honn se sisch oangschrengd bei de Klubb. Beim Chick Kölsch, änner vunn vier Präsdidende sinn alle Dreehd zusammegeloof. Seid oafong Juli hadds in Whats App-Gruppe Oaweisunge unn Hiweise gäbb. Ess sinn Frache gschelld unn a beandword woor. Sie honn gemach unn geduu wiees Messa. Es haadd ä Uwe Seeler- unn a ä Hoinz Kubsch Dreff gäbb, fa die VIP’s, in Bärmensesrisch ABB’s, also „Aarich Bekoonde Bärmesenser.“ Ringsrum umms Schdadion hadd de „junge Beetz“ ess Esse unn Drinke middorganissiert. Die Bolizei unns Ordnungsoamd honn de Vakehr gerechelt unn geguggt, dass a alles gladd laafd unn joo nix bassierd. Schaad awwer, dass ma oam Schluss no dee Falängerung läderle gäje die Bundesligabrulljes aus Hamburch fallor honn. Vellisch unfadiend a noch, weil beino hädde ma se gforzd. Uff jede Fall iss die Klubb jetzad schunn de Pokalsiecher der Herze.

Awwer ihr Leid. Jetzad schtelle Eich mool vor, mir hädde des Gemachs alle feerdsee Daa, wiees im Yannick Grieß soi Vadder drucke oagemerkt hadd. Zeehdausend Leid im Schdadion, devuu dreijehalbdausend vunn dänne Letzohre vunn ausserhalb. Jeddes mool deed uff de Huschdaheeh ä Aussnohmezuschtand herrsche. Es Ordnungsoamd mist uffschtocke, meer Bolizischde oagfordadd werre. Die Fans vunn de onnre Varoine wärn bschdimmd näd so oaschdännisch wie die Hamburcher. Die Park misst genauso wie die Bäcka unn Metzga vunn de Wasgau Sonderschischdde innleje, umm die hungrische unn dorschdische Meiler vunn de Auswärdische unn de Bärmesensa zu schtoppe.

Do deeds do owwe im Fromas-Schadion onscherd zugeeje wie jetzad wonn sich meischd knapp dausend, wonn iwwerhaupt, uff de Dribiehn faliere. Do wär nix mä midd mol korz vorm Schbiel schnell uff die Huschdaheeh faare unn de Kummpel mool per Hoindschlach begriehse. Wonn isch do draa dänk grie isch die Gääsegichder. Unn Ihr?