Geschbräche mim Bruno

Die Mundart-Kolumne von psst! Pirmasenser Storys

„Do fallt dir nix mäh in“, bäbbat de Bruno schun vun weidem. „Was is´n los, Bruno?“ „Des froosch du noch? Guck noo Berlin, guck noo Omerigaa, guck in die Ukraine, guck in de Nahe Oschde, die honn doch all nimmi alle Ladde om Zaun!“ „Kumm, dräät mol e bissl uff die Brems, Bruno, loss uns mol in Ruh iwwa alles schälle.

Ich wääß, die Aussichde sinn iwweraal net so rosich. Schoinz isses uns zu long zu guut gong.“ „Jo, des kummt schun e bissl in die Richdung. Awwa männsch du net aa, dass sich die meischde Bollidigga alleweil ufffiehre wie im Kinnagaade?  Die vezehle zwar, dasse alles zum Wohle des Volkes mache deede. Wonnde awwa genau gucksch, geht’s ne um ihr Eichnes. Wonn se werklich zum Wohle des Volkes schaffe wollde, donn deede se sich in alla Ruh zommesetze un wie veninfdiche Mensche mitnonna redde ohne se gugge, vun wellra Paddei die äänzelne sinn.

Jetzat geht’s ball widda los mim Wahlkompf, wo se widda iwwanonna herziehje ohne Reschbekt – un hinnenoh, je noodäm, wie de Wähla entscheid, missese widda zommeschaffe. Awwa weil se vorher schun es gonze Porzellan korzhimmelsklää gschlaa honn, gebbt´s noch net emol e gonzi Kaffetass fa zomme e Kaffee se drinke. Do werd net integriert, do werd bloß polarisiert, was de extreme Paddeie zuguut kummt. Wonn ich ma allää schun denne fränkische Zwoggl ooguck, denne Söder. Wer so e Paddeifroind hat, brauch kää Foinde. Wonn der zu mir saa deet, er deet mich voll un gonz unnaschditze, ginge bei mir sämtliche Alarmlämblcha oo. Moi Kolleech ausem Saarlond deet saa, dem deet er grad so weit traue, wie er e Klavier schmeiße konn.“ „Awwa die Oppositzjohn muss doch alsemol de Finga in die Wund lehje, das is doch denne ihr Aufgab!“ „Jo, awwa mit Maß un Ziel. Wie hab ich do mol delääs? Oppositzjohn sinn die, wo hinnenoh vorher imma alles bessa gewisst honn wolle! Alla, mir werre mol gugge, vielleicht schmeißt jo de Herrgott aa Hirn vum Himmel un trefft dodebei noch die richdiche!“

„Un, was saasche zu Omerigaa?“ „Heer ma uff. Awwa änns schdimmt, Omerigaa is des Lond mit de uubegrenzde Meechlichkeide. Du bisch e vorbeschdroofda Vebrecha, bisch e uugehowwelda, narzissdischa Psychopath, bisch e Matscho, wo lieht, wonna es Maul uffmacht, bisch e Rassischt vun de schlimmschde Sort, traasch de Hass vor dir her wie e Monschdranz, liebsch nur dich selwa un schdellsch oo, was Gott vebott hat – donn konnsche in Omerigaa Präsident werre! Wer will dem Land in Zukunft noch vetraue?“

„Liewa Bruno, die Mensche dort honn ne gewählt un ich befercht, dass gonz viel vun denne ball die Duddl verolle werre. Do werd viel kabutt gehje, ich befercht, viel zu viel! Awwa vielleicht kummt aa alles gonz onnascht. Mir gewwe die Hoffnung net uff, odda?“

„Jo alla!“

---

Du willst mehr News aus Pirmasens? Abonniere jetzt kostenlos den Newsletter und erhalte die neusten Nachrichten aus der Stadt bequem ins Mail-Postfach. Einfach hier klicken: