- Newsletter
- Kolumnen
- Kolumne von Rolf Tilly
Geschbräche mim Bruno

Die Mundart-Kolumne von Psst! Pirmasenser Storys
Hann Sie schunnemol e zornichi Elwedritsch gsieh? Do kännt´s em richdich buzzl werre.
Om Dunnaschdaa schdeht de Bruno bei mir vor de Dier, knallroda Kopp, digga Hals, de Schnawwel hat geziddat, richdich zum Ferchde. „Bruno, was is´n los, so außa dir hab ich dich doch noch nie gsieh?“
„Des froosch du noch? Hasch du kää Nachrichde geguggt odda geheert? Ich kännt naus wo kää Loch is! Jessesmariaunjosef, sinn die vun alle guude Geischda veloss?“ „Was reecht dich donn so uff?“ „Also des, wo sich de Merze Fritz geleischt hat, des derf jo net wohr sinn. Hat der sellemols im Gschichtsunnaricht gfählt, wie die Weimara Republik un de Oofong vum Nationalsozialismus dorchgenumm wor is?“ Donn hat de Bruno ebbes gsaat, wo ich jetzat net wertlich widdagewwe will. Es war sinngemäß so, als dassa befercht hett, beim Merze Fritz wär e schwerwichendi kolibakterielli Veunreinichung im Cerebralbereich feschtseschdelle, was imma des hääße soll.
Un ich muss saa, mit denne Bedenke is de Bruno net ällää. De Bruno hat noch gemännt: „Ei dem do trau ich grad so weit, wie ich e Klavier schmeiße konn!“ Im Fußball deet ma glaawich saa, dass des e saudummes, unneediches Eichedoor war. Mir is dodebei des Gedicht vum Zauberlehrling ingfall, der wo die Geischda, die wo er geruf hat, nimmi loswerd.
De leida viel so frieh gschdorbne Andy Brehme hett dodezu gsaat: „Hast du Scheiße am Fuss, hast du Scheiße am Fuss!“ De Bruno hat noch gemännt, des wär e Frontaloogriff uff die Demokratie un uffs Grundgesetz gewesst un jeda uffrechde Demokrat un jeda mit chrischtlicha Inschdellung sollt desdo se Läbdaa net vegesse. Awwa vor alle Dinge sollt sich des kää uffrechda Demokrat un kää uffrechda Chrischt gefalle losse!
Es werd Zeit, dass ma des so deitlich mache, dasses aa der schdurkobbich Saualända kabbiert. Ferchden eich net un schdehn uff! Alla donn.
Rolf Tilly
Rolf Tilly ist Weltmeister-Jahrgang 1954 und von Beruf Diplom-Ingenieur für Elektrotechnik, Schwerpunkt Nachrichtentechnik. Das hat viel mit Kommunikation zu tun, womit er sich sehr intensiv beschäftigt – vor allem in MundArt. Schon als Schüler haben ihn Dialekte interessiert, der Pfälzer Dialekt besonders. Er ist seit 25 Jahren aktiv in der „Fasenacht“, seit 15 Jahren leitet er eine Mundarttheatertruppe, war einige Jahre Kolumnist bei der PZ, hat zwei Mundartbücher geschrieben und ist seit sieben Jahren Autor und Mitstreiter der Kleinkunst-Gruppe „Die 3 Palatinenser“.
Du willst mehr News aus Pirmasens? Abonniere jetzt kostenlos den Newsletter und erhalte die neusten Nachrichten aus der Stadt bequem ins Mail-Postfach. Einfach hier klicken: