Geschbräche mim Bruno

Die Mundart-Kolumne von Psst! Pirmasenser Storys

Vor korzem issa ma widda iwwa de Wääg geloff, de Bruno. Die äänt Auebrau hadda so e bissl hochgezoo un gemännt: „Un, jetzat sinn jo die Wahle un die Fasenacht rum, do misst´s jetzat e bissl ruhicha weidagehje. Awwa ich befercht, do werd nix draus.

Die, wo die gonz Zeit iwwanonna gscholl honn wie die Rohrschbatze, sich alles zommegehääß honn un gemach honn, wie wonn nur sie die Weisheit mim Leffel gfress hedde, misse jetzat mehr odda wännicha de Gong noo Canossa mache un bei de onnre um guud Wedda oohalle, alldieweil se die dringend brauche fa se regiere. Des is jetzat schoinz Mode, dass ma all die, mit denne wo ma die gonz Zeit gut befreundt war, ooschdännich vor de Kobb schdoost!“

„Ja, liewa Bruno, do muss ich da Recht gewwe. Im Wahlkompf sinn se jo allminonna prakdisch puddlaaschnaggich rumgeloff, weil die onnre kää guuda Fadem on ne geloss honn. Dodebei wär´s alsemol guud gewää, sich on de eichne Nas se pagge un denne Haufe Mischt vor de eichne Dier erschdemol wegsekehre.

Wonn ich sieh, wie sich alleweil der Alexander Dobrindt ufffiehrt, grad wie de Graf Koks vun de Gasooschdalt, do sollt der mol die Leit froo, wo sellemols im Vekehrsminischderium gschafft honn, wo der Alex grad Minischda war. Er hat dort de Beinome `Pannen-Alex` gehatt, mehr muss ma zu dem Männl glaawich nimmi saa.“

„Des mim Freundevegraule macht jo de Trumpe Donald in ännra Gschwindichkeit wie änni vun denne Raggeede vun soim Busekumbl Elon. Die Wirkung is jo ähnlich wie bei denne Raggeede, die explodiere un sinn kabutt, genauso wie die alde Freundschafde. Das werd dem Donald un alle Ommerigoona noch aarich Bauchweh mache. Hasche jetzat aa gsieh, dass es Donaldche vorm Weiße Haus Reggloome fa em Elon soi Teslakarre gemach hat? Ich hab ma vesucht vorseschdelle, wie des bei uns wär, wonn de Bundespräsident odda de Bundeskonzla Reggloome fa VW, BMW, Porsche, Mercedes, Audi unsoweida mache deede. Do wär ratzfatz de Deiwel los – un zwar zurecht. Ihr Ommerigoona, was honna do fa e Granaadeseggl gewählt. Der macht eich un eia Lond kabutt – Hauptsach, er un soi Milljadärskumbl vediene sich e goldni Nas. So e Seggl wär bei uns Elwedritsche hochkondich nausgfloo!“

„Du, Bruno, mir all känne nur hoffe, dass die Ommi sich on de Elwedritsche e Beischbiel nemme!“ Des hat jetzat mol misse gsaat sinn! Alla donn.

Rolf Tilly

Rolf Tilly ist Weltmeister-Jahrgang 1954 und von Beruf Diplom-Ingenieur für Elektrotechnik, Schwerpunkt Nachrichtentechnik. Das hat viel mit Kommunikation zu tun, womit er sich sehr intensiv beschäftigt – vor allem in MundArt. Schon als Schüler haben ihn Dialekte interessiert, der Pfälzer Dialekt besonders. Er ist seit 25 Jahren aktiv in der „Fasenacht“, seit 15 Jahren leitet er eine Mundarttheatertruppe, war einige Jahre Kolumnist bei der PZ, hat zwei Mundartbücher geschrieben und ist seit sieben Jahren Autor und Mitstreiter der Kleinkunst-Gruppe „Die 3 Palatinenser“.

---

Du willst mehr News aus Pirmasens? Abonniere jetzt kostenlos den Newsletter und erhalte die neusten Nachrichten aus der Stadt bequem ins Mail-Postfach. Einfach hier klicken: