Geschbräche mim Bruno

Moi Liewa, war des e Iwwaraschung fa de Bruno in Leipzich. Mondags homma gleich mol e Ausfluch in die Schdadt gemach, om Auguschdusblatz simma aus de Schdrooßebohn ausgschdie (des mit de Schdroßebohn war aa ebbes Neijes fa de Bruno), laafe on de Oper vebei, do siehma so e großi Sail, wo gonz groß druffschdeht „Ich bin Brunno“.

Mir honn uns oogeguggt: „Gebbt´s des? Is des e Zufall odda e Zääche?“ Uff alle Fäll warema mol gonz schää wunnanaasich un honn oogfong se rescherschiere. Was homma entdeckt? Do gebbt´s doch tatsächlich e Schdadtdääl in Leipzich, wo „Eutritzsch“ hääßt. Do gebbt´s e Kläägaadeoolaach „Heimatscholle“.

Do simma mol onne, honn uns umgeguggt … un wer laaft uns iwwa de Wääg? De Brunno vum Schdomm der Eutritzsche. Der hat uns oogeguggt wie e Goggl wonn´s blitzt. „Wer seid ihr denn, wo gommdn ihr her?“ „Ei ich hääß Bruno un bin e Elwedritsch aus de Palz“. „Du schbrichschd obr goomisch“, gebbt de Brunno reduur. Mit e bissl Iwwasetze riwwaniwwa isses donn gong. De Brunno hat e bissl in soine Unnalaache rumgsucht un hat gemännt: „Du bist wohrscheinlisch e Veddor vierdn Grodes, mei Gudsdor!“ „Hä, was hadda gemännt?“ Ich hab´s em Bruno erklärt: „Er männt, du wärsch sosesaa e Noogeschwischdakinn in de vierde Generatzjohn.“ Mir honn donn feschtgeschdellt, dass die Eutritzsche do owwe in Leípzich e Seidelinje vun de Elwedritsche in de Palz sinn. Was honn sich de Bruno un de Brunno gefräät, dasse sich roin zufällich getroff honn. Mir honn donn noch e gonzi Weil beim Brunno im Gaade gehoggt, honn es ää odda onna Bierche geschläwwat, em Brunno soi Fomillje kennegelernt, viel vezehlt un gelacht. Sie honn donn ausgemach, dass de Brunno nechscht Johr in die Palz kummt un dort die Pälza Vewondschaft kennelernt.

Es hääßt jo imma, „wenn einer eine Reise tut, dann kann er was erleben“. Beim Bruno hat des voll zugetroff. Er hat mich oogeschdubbt: „Wonn de widda uff Tour gehsch mim Wohnmobil, nemmsche mich mit! Desdo Abenteuer vegess ich im Lääwe net, wer hett des gedenkt!“ Aa fa mich war de Besuch in Leipzich volla großaadiche Indrick. De Besuch vun de Nikolaikerch, vun wo die friedlich Revolution 1989 ausgong is, die gonz Geschicht drummerum, aa die Indrick von de Thomaskerch, wo de Johann Sebastian Bach gewirkt hat, sinn unna die Haut gong. Leipzich is e bundi Schdadt mit Mensche aus de gonze Welt, mit Leit, wo offe uff em zugehje. Ach, uffem Häämwääg hat de Bruno gefroot: „Wieso gebbt´s in Leipzich eichentlich extra e Schdadtdääl, wo noo de Eutritzsche  benonnt is un in Bärmesäns homma noch net emol e Blatz odda e Wääg, wo noo uns Elwedritsche benonnt is?

Alleweil mache se doch die Umfraach zum Leitbild vun de Schdadt, do dräätsche mol em OB onns Schiebää, der soll mol defor sorje, dasses ebbes in de Schdadt gebbt, wo on die Elwedritsche erinnat. In Dahn  un in Neischdadt honnse zumindescht mol e Elwedritschebrunne!“ Alla, womma de OB iwwa de Wääg laaft, werr ich´s em ausrichde!

---

Du willst mehr News aus Pirmasens? Abonniere jetzt kostenlos den Newsletter und erhalte die neusten Nachrichten aus der Stadt bequem ins Mail-Postfach. Einfach hier klicken: